Bara tvö ár?! Er ekki allt í lagi í réttarkerfinu?

Hvernig stendur á þessu? Bara tvö ár?!  Er ekki allt í lagi í réttarkerfinu?

Við erum að tala um líf þriggja saklausra barna!!!

Halló!

	2 ára fangelsi fyrir brot gegn börnum sínum
Ábyrgðarmaður færslu Tenging við þessa frétt hefur verið rofin vegna kvartana.

Þögnin stendur alltaf fyrir sínu :)

x

 

 

 

 

 

 

 

 

x

Er þetta í lagi?

Alveg er ég hissa!  

Þannig er að dóttir mín er í hönnunarnámi. Hannar föt og saumar alla daga. Vinir og kunningar eru farnir að leggja inn pantanir og mín bara spennt yfir því að koma hönnun sinni á framfæri.

Henni datt í hug að fara í bæinn og kanna hvort það væru einhverjar verslanir sem tækju að sér að selja föt fyrir unga hönnuði. Jú, jú það var nú ekkert mál! Hún settist niður eftir bæjarröltið og fór að hugsa hvernig verðleggja ætti flíkurnar. Spurði mig síðan út í skattamálin og virðisaukaskattinn sem að sjálfsögðu leggst ofaná. Eftir að hafa farið í gegnum það með henni spyrði hún "Hvað eiga þá buxur frá mér að kosta?  Verslunin tekur 45% í sölulaun - hvernig reikna ég þetta út?"

Verslunin tekur 45% í sölulaun!  Ha...ég kváði nú bara...hvað segir þú??     

Ég vissi að ef ég væri að selja bíl, væri ég að borga bílasölunni 3,5-3,9%. Síðast þegar ég seldi húsnæði, var fasteignasalinn að fá eitthvað milli 2-3% og þegar ég sel hljóðfæri í umboðssölu, getur það farið upp í 15%. En að fara fram á að fá 45% er að mínu mati algjörlega siðlaust. Hönnuðurinn, sem leggur út í alla hugmyndavinnuna, gerir snið, kaupir efni og saumar flíkina fær rétt rúmlega helming til að standa straum af öllum pakkanum. 

Ég ráðlagði dóttur minni að taka bara góðar myndir af hönnuninni sinni, setja þær inn á myspace síðu og gera út þaðan. Margfalt ódýrar á allan hátt! 

Af hverju ekki? Í alvöru??

Ég spyr bara af hverju ekki 5 ára deildir innan grunnskólans?

Mér finnst rökin um að það sé ekki heimild fyrir því í núgildandi lögum ekki nógu góð. Kalla því hér eftir raunverulegum svörum. Og einnig af hverju leikskólakennarar séu á móti þessu.

Ég á fjögur börn, þarf af þrjá drengi sem allir hafa byrjað í skóla 5 ára. (Var bara því miður ekki nógu hugmyndarík þegar dóttir mín, elst, var fimm ára). Okkar reynsla er mjög góð, bæði úr Ísaksskóla og Seljaskóla, þar sem sonur minn elsti byrjaði í 6 ára bekk 5 ára. Við hefðum alls ekki viljað hafa þetta öðruvísi!

Ég man hinsvegar eftir því hvernig hugmynd minni um að stráksi byrjaði svona ungur í 6 ára bekk, var tekið á leikskólanum sem hann var á.  Einn leikskólakennarinn spurði mig hvort ég héldi að minn sonur væri eitthvað gáfaðri en hinir 5 ára strákarnir. En það var alls ekki málið. Hann var bara orðinn leiður á leikskólanum og þurfti að fá fleiri krefjandi verkefni og meiri örvun. Tek það fram að þetta er og var frábær leikskóli og við ánægð með hann í alla staði! Eftir nokkra daga á greiningarstöðinni, var ákveðið að hann hæfi skólagöngu. Því var reyndar komið inn hjá mér að það ætti eftir að koma í ljós seinna hvort ég hefði verið að gera rétt. Tíminn einn gæti skorið úr um það. 

En sem betur fer gekk þetta allt upp. Stráksi var yfirleitt alltaf höfðinu hærri en bekkjarfélagarnir. Og hefur fylgt þeim árgangi sem hann byrjaði með alla tíð. Hann fermdist því ári á undan sem var ekkert mál - en fannst kannski frekar fúlt að þurfa að bíða árinu lengur eftir bílprófinu. 

Ég vona að málið fái faglega umfjöllun í mennta- og leikskólaráði og í framhaldinu að foreldrar fái val um skólagöngu 5 ára barna sinna án þess að þurfa að sækja í skóla langt frá heimili sínu.

Leikskólakennarar andvígir 5 ára bekkjum

Lætin í Ráðhúsinu s.l. fimmtudag

S.l. fimmtudag gerði ég mér ferð í Ráðhúsið. Langaði að fylgjast með hvernig fundurinn yrði nú, þar sem ég var einnig viðstödd þegar fráfarandi meirihluti tók við völdum.
Í fyrsta lagi var erfitt að fá bílastæði í miðbænum, jafnvel þótt ég væri tímanlega. Loks tókst mér að leggja bíl mínum bak við strætóhúsið í Lækjargötu. Mig minnir að ég hafi borgað tæplega 400 krónur fyrir tvo tíma og tuttugu mínútur í stöðumælinn. Hugsaði um það á leið í Ráðhúsið að betra hefði verið að taka strætó, eða láta keyra mig á staðinn. Heilsaði nokkrum þingmönnum á leið minni framhjá Alþingishúsinu og velti fyrir mér í hvaða aðstæður ég væri að fara.
Fjöldi fólks hafði safnast saman við innganginn og alla leið upp á áheyrendapallana. Sjónvarpsmyndavélar og fréttamenn að fylgjast með og mynda fjörið. Fyrir utan alla menntaskólakrakkana sá ég einn og einn stuðningsmann fráfarandi meirihluta.
Það var svo troðið við innganginn inn á áheyrendapallana, að ég var farin að sjá sjá eftir fjörurhundruðkallinum og ætlaði að snúa við og fara aftur heim, en var svo heppin að félagi minn úr Breiðholtinu bauð mér sæti fremst á pöllunum og gat því fylgst vel með öllu sem fram fór.
Það sem stakk mig mest er hversu mikil heiftin var í "mótmælendunum" og einnig að sjá Svandísi Svavarsdóttur ýta undir frekari læti heldur en að róa sitt fólk. Einnig fannst mér að fráfarandi borgarstjóri hefði geta staðið upp og beðið fólkið "sitt" að róa sig og sýna stillingu.
Eftir ýmis dónaleg frammíköll og að mínu mati mikla vanvirðingu við fundinn, heyrði ég að tveir ungir menn sem höfðu staðið fyrir frammíköllunum voru að tala saman og annar sagði við hinn "....þegar Dagur og hin konan töluðu...." átti þá við Svandísi Svavarsd. var mér ljós að þessir ungu herrar vissu lítið um hvað málin snérust í Ráðhúsinu þennan dag.
Ég lét mig hverfa fljótlega eftir að hlé var gert á fundinum, yfir mig hissa á framkomu unga fólksins. Og minntis þess að sitja á pöllunum í október, þar sem fólk þorði varla að hreyfa sig til að valda ekki truflun á fundinum.

Til hamingju með nýjan meirihluta í borginn - kæru borgarbúar!

Ánægð með Frístundakortið!

Bæði sem foreldri og stjórnandi tónlistarskóla sem tekur við frístundakortum verð ég að lýsa ánægju minni með Frístundakortin. Tel þau vera hið besta mál.

Elsti sonur minn er á Dale Carnegie námskeiði og sá næst yngsti í Drengjakór Reykjavíkur og finnst mér frábært að gera notað kr.  24.000,- upp í gjöldin þeirra. 

Ég sé svo í tónlistarskólanum að það eru miklu fleiri börn sem fá notið með tilkomu frístundakortanna. Og því ber að fagna! Kv. Edda Borg 

Vafstur með frístundakortin

Frístundakort

Borgarráð samþykkti á haustönn 2006 að fela Íþrótta- og tómstundaráði (ÍTR)að vinna tillögur um nýtt styrktarkerfi svokallað „frístundakort" vegna þátttöku barna og unglinga í æskulýðs- íþrótta- og menningarstarfi í borginni. Frístundakortin tóku svo gildi 1.september s.l.

Einhverjir aðilar vilja meina að með innleiðingu frístundakortanna hafi gjaldskrár þeirra félaga sem taka á móti frístundakortinu hækkað. Og sum félög eru ósátt við undirbúning Reykjavíkurborgar í ferlinu.

Ég er í þeim sporum að reka tónlistarskóla sem tekur við frístundakortunum og get fullyrt að gjaldskrá okkar hækkaði ekki vegna frístundakortanna. Og við fengum mjög greinagóðar upplýsingar frá starfsfólki Reykjavíkurborgar með framkvæmdina.

Ég vil nota tækifærið og lýsa ánægju minni með að þessi frístundakort hafi verið tekin upp. Að mínu mati hefur þetta gengið mjög vel og tel ég að ég hafi fengið góðar upplýsingar frá RVB um hvernig bera ætti sig að. Hvað varðar skráningu og upplýsingar til foreldra um framkvæmd, var okkar vinna miklu meiri en við gerðum okkur grein fyrir í byrjun. En það gleymist þegar glaðleg andlit nemendanna birtast í skólanum.

Það er greinilegt að Frístundakortin hafa opnað fleiri nemendum leið til þess að njóta tónlistarnáms, sem að öðrum kosti hefðu ekki haft ráð á.
Húrra fyrir því!

Hlakka til áframhaldandi góðs samstarfs og góðra upplýsinga frá RVB.

Kveðja,
Edda Borg

Jólaböllin í ár með besta jólasveininum!

Undanfarin 16 ár höfum við tekið að okkur að leika á jólaböllum í fyrirtækjum, ýmsum félögum og stofnunum. Þór Tulinius hefur leikið aðalmanninn, enda tekur hann hlutverkið alvarlega og er sá besti sem ég hef hitt. Þegar um stór fyrirtæki er að ræða þá erum við þrjú í hljómsveitinni plús jólasveinninn. Annars höfum við Þór líka tekið að okkur að skemmta á minni stöðum, þá án hljómsveitarinnar.

Við spilum jólalögin fyrir hlé og svo hreyfisöngva, dansa og ýmis skemmtileg lög af diskinum okkar Ding Dong eftir hlé. Þar kemur tónmenntakennaramenntun mín að gagni en mitt hlutverk er að spila á píanó, syngja og stjórna skemmtuninni. Passa upp á að allir labbi í rétta átt og klappi og stappi á réttum stöðum. Ég er ekki frá því að mér finnist þetta skemmtilegra en að leika á dansleikjum fyrir eldra fólkið þó það sé oftast mjög fínt.

Nú er búið að bóka hópinn töluvert og m.a. á Jólaball Íslendingafélagsins í London þann 24.nóvember n.k. og stendur mikið til. 

Bókanir eru á fullu og fara "bestu dagarnir" að vera fullbókaðir. Ef þú þekkir einhvern sem er að leita að góðum skemmtikröftum til að taka að sér jólaballið í þínu fyrirtæki eða stofnun, þá er bara að hafa samband á [e-mail]  

Jólakveðja, Edda Borg 

 

Aðalnámskrá tónlistarskóla - fyrstu tónleikar vetrarins!

Frábær fundur sem við kennarar og skólastjóri í Tónskóla Eddu Borg héldum fyrir foreldra nemenda við skólann um Aðalnámskrá Tónlistarskóla.

Mæting var miklu betri en við þorðum að vona. Gaman að sjá hvað foreldrar eru áhugasamir um tónlistaruppeldi barna sinna og taka greinilega mikinn þátt í því. Í stuttu máli fórum við yfir þá þætti námskrárinnar sem skipta máli. Allir kennararnir fengu að tjá sig hver um sitt hljóðfæri og hélt Hólmfríður Sigurðardóttir píanókennari síðan erindi um aðbúnað heima fyrir og þátt foreldra og heimila í tónlistaruppeldinu. Stórgott erindi sem gaman væri að birta hér fljótlega.

Nú á laugardaginn, 27.október verður skólinn með nemendatónleika í Seljakirkju kl. 11., 12. 13 og 14:00 þar sem flestir nemendur skólans koma fram. Allir velkomnir!

Við höfum alltaf lagt upp með að hafa tónleikana skemmtilega, fjölbreytta og umfram allt EKKI OF LANGA - eða ca. 40.mín. Þarna eru sumir nemendur að stíga sín fyrstu skref og margir að koma fram á tónleikum í fyrsta skipti.  

Væri gaman að sjá sem flesta!

Kveð í bili - Edda Borg

Ný í Bloggheimi

Hef verið að fylgjast með að undanförnu í þessum svokallaða Blogg-heimi.

Var aðallega að því svo ég gæti verið föður mínum til aðstoðar, þegar hann kemst loksins að því hvað þetta er sniðugt. Hentar honum örugglega.

Svo nú þýðir ekkert að hangsa lengur Ólafur! Ég skal aðstoða þig að setja upp síðuna :)